Ang Buhay OFW sa Saudi Arabia

Siguro isa lang ako sa mga libo-libong OFW na may ganitong karanasan dito sa bansang Saudi Arabia.  

Ginawa ko ang blog na ito dahil gusto kong makatulong sa mga kagaya ko, at sa mga nangangarap pang mag-abroad. Gusto kong malaman nila kung ano talaga ang buhay dito.  

Sa totoo lang, hindi naman talaga ako mahilig magsulat o gumawa ng blog. Wala rin akong alam kung paano. Ginamit ko lang ang technology na meron tayo ngayon. Para na rin ito ang paraan ko para ilabas ang pagka-homesick ko. Alam mo naman, internet lang ang pangunahing libangan dito sa Saudi.  

Ang lifestyle dito simple lang: *Trabaho - Accommodation.*  

Makakapasyal ka lang tuwing araw ng sahod. Magpapadala ng pera, tapos kakain ng lutong Pinoy sa downtown. Yun na yun.

*ANG PANGAKO VS ANG KATOTOHAN*

Sabi nga nila, paswertehan lang talaga ang pag-aabroad. May employer na makatao at nakakaintindi. Mayroon ding abusado at sarili lang ang iniisip. Hindi ko alam kung dahil ba ito sa kultura nila o talagang ganoon na sila.

Tatlumpu kaming magkakasamang dumating dito sa Saudi. May first-timer, may ex-abroad na.  

Sabi ng mga galing na dito, maliit daw ang bigayan: *1,300 + 200 SR.*  

Pero nainganyo kami sa sinabi sa orientation ng agency na may komisyon pa. Minsan daw, mas malaki pa ang komisyon kaysa sa sahod. Kaya pumayag na kami sa kontrata.  

Kahit may complication tulad ng under wage at maling position title. Ang nakalagay sa kontrata namin ay *1,300 + 300 SR* at *Small Truck Driver* ang posisyon.  

Wala na akong magawa. Nakapagbigay na ako ng placement fee na inutang ko pa sa lending, at nakapag-resign na rin ako sa trabaho sa Pilipinas.

*BUHAY SA JEDDAH: PASIYAGA AT PATIYAGA*

Unang araw pa lang namin, pinag-report agad kami sa main office para sa medical. Kailangan ito para sa Iqama o residence permit. Binigyan din kami ng temporary permit o _Warqa_ na 90 days lang ang bisa. Binigyan din kami ng food allowance para sa SIM card at iba pangangailangan. Nag-apply din kami agad ng driver's license.

Pagkatapos ng 3 months na probation, na-deploy kami sa iba't ibang probinsya. Ako, dito sa *Jeddah* napunta.

Isa akong *Retail Salesman* sa isang malaking manufacturing company dito. Ang trabaho ko ay umiikot sa mga mini-market o _bakala_ para mag-alok ng produkto. Halos naikot ko na yata ang buong Jeddah.  

Ganito lang ang labanan dito: *pasisipagan at patiyagaan.*  

Ang problema, hindi agad-agad nakukuha ang komisyon. May mga customer na mahirap singilin. Papabalikin ka sa susunod na linggo, tapos hindi pa rin magbabayad. Ang ending? *Stop commission.* Masakit. Pinagpaguran mo na, tapos hindi mo pa makukuha.

Noong una, maganda pa ang sistema ng komisyon. Pero habang tumatagal, palala nang palala ang takbo ng kumpanya. Nauubos ang komisyon ko dahil sa mga kaltas:  

- Short sa stock  

- Expired goods  

- Mga tindahang nagsara  

- Mga customer na hindi nakabayad  

Hindi pa kasama dyan ang traffic violations at yung _“Others”_ na deduction sa payslip na walang paliwanag.

Pero sa pagkakaalam ko, may budget kami para sa expired goods. At hindi namin dapat sagutin ang mga tindahang nagsara.

*ANG PAKIKIPAGLABAN*

Dahil dito, humingi ako ng tulong sa *Philippine Overseas Labor Office (POLO)* sa loob ng Jeddah Consulate General. Inireklamo ko ang kumpanya dahil sa hindi maipaliwanag na kaltas at paglabag sa Saudi Labor Law.

Marami kaming nagreklamo noong una. Pero isa-isa silang umurong. Ako na lang ang natira. Siguro dahil sa takot at panggigipit ng kumpanya nung nalaman nilang nagreklamo kami sa Consulate.

Matapos pag-aralan ng POLO ang reklamo ko, binigyan nila ako ng recommendation para ihain ang kaso sa *Saudi Labor and Settlement Dispute*. Isang ahensya ng Saudi na humahawak ng mga reklamo ng mga expatriates.  

Matapos i-translate ang mga ebidensya, na-file ang kaso. Naglabas ng subpoena ang *Ministry of Labor (MOL)* para sa kumpanya.

*PAGGIGIPIT AT PAGKAKULONG*

Dahil sa ginawa ko, naghigpit ang kumpanya. Nag-audit sila. Sinaliksik ang mga customer ko kung lehitimo ba lahat ng pautang. Naghanap sila ng butas na pwedeng ibato laban sa akin.

At hindi ako nagkamali. *Nagsampa sila ng kaso laban sa akin sa Riyadh*, kung saan ang main office nila. Inakusahan nila ako na nagnakaw daw ako ng *25,000 SR.*

Ginawa nila lahat. Nagpadala pa sila ng _Notice for Transfer of Worker_. Nakikiusap na pumunta ako sa Riyadh para magtrabaho ulit, at babayaran ko daw tuwing sahod ang 25,000 SR na di umano ay ninakaw ko. Hindi ko ito sinunod. Itinuloy ko ang pag-attend sa mga hearing.

Pinahinto nila ako sa trabaho. Hindi na rin ako binigyan ng sahod.  

Makalipas ang isang buwan, isinama ako ng manager na Egyptian. Sabi may meeting daw at ibabalik ako sa trabaho. Hindi ko dinala ang mga dokumento ko dahil sa opisina lang ang akala ko. Pero diretso kami sa pulis. *Doon pala ako makukulong.*

Umabot ako ng *isang linggo sa kulungan.* Pero nakalabas din ako dahil sa nauna ko nang reklamo sa MOL. Iginagalang ito ng mga pulis kaya pinakawalan nila ako.

Itinuloy ko pa rin ang kaso. Umabot ito ng *limang buwan.*  

Ang pamilya ko sa Pilipinas, nagtiis. Wala akong maipadala. Hindi rin ako makahanap ng ibang trabaho dahil pinipigil ako ng dating employer.  

Sana kung nagkaisa lang kaming lahat na lumaban hanggang huli, matatakot sa amin ang kumpanya.

*NGAYON*

Sa ngayon, tapos na ang kontrata ko dito sa Saudi. Pero nandito pa rin ako.  

Ang mga dating kasama ko, nakauwi na. Ang iba naman, tinatamasa na ngayon ang pagbabago sa sistema ng kumpanya. Dahil sa reklamo ko sa Ministry of Labor, nakita ng kumpanya na marami pala silang nilabag sa Saudi Labor Law.

Hindi madali. Pero kung hindi ako lumaban, sino?

---

*PAALALA SA MGA KABABAYAN:*  

Mag-ingat sa kontrata. Alamin ang karapatan. At huwag matakot humingi ng tulong sa POLO at Consulate. Nandyan sila para sa atin.